కన్య రాశిఫలములు

హేమలంబనామ సంవత్సర రాశిఫలములు

Telugu Rashi Phalalu (Rasi phalamulu)

Ugadi Rashi phalaalu

Telugu Rashi Phalalu (Rasi phalamulu) - 2017 - 2018 Hemalamba samvatsara Kanya rashi phalaalu. Family, Career, Health, Education, Business and Remedies for Kanya Rashi in Telugu

ఉత్తర 2,3, 4 పాదాలు (టొ, ప, పి)
హస్త 4 పాదాలు (పు, షం, ణ, ఠ)
చిత్త 1,2 పాదాలు (పె, పొ)

కన్యారాశి వారికి ఈ హేమలంబ నామ సంవత్సరంలో మిశ్రమ ఫలితాలుంటాయి. సెప్టెంబర్ వరకు గురు గోచారం అనుకూలంగా ఉండక పోవటం, జూన్ వరకు శని నాలగవ ఇంట సంచరించటం వలన శ్రమ అధికంగా ఉండటం, ఫలితం అనుకున్నంత లేకపోవటం జరుగుతుంది. వృత్తిపరంగా కూడా శ్రమకు తగిన గుర్తింపు లేకపోవటం వలన కొంత నిరాశకు లోనవుతారు. అలాగే మానసిక ఒత్తిడులు కూడా ఉంటాయి. రాహుగోచారం పన్నెండవ ఇంట సంచారం కూడా ఆరోగ్య విషయంలో అలాగే మానసికంగా కొన్ని సమస్యలను ఇస్తుంది. అలాగే వృత్తిలో అనుకోని మార్పు రావటం లేదా అదనపు బాధ్యతలు చేపట్టాల్సి రావటం జరుగుతుంది. మత, ఆధ్యాత్మిక, విద్య సంబంధ విషయాలమీద ఆసక్తి పెరుగుతుంది. గురువు సెప్టెంబర్లో రెండవ ఇంటికి రావటం, అలాగే రాహువు పదకొండవ ఇంటికి రావటం, జూన్ - అక్టోబర్ మధ్యన శని తిరిగి మూడవ ఇంట సంచరించటం వలన ఇంతకాలం పడిన సమస్యలు ఒక్కసారిగా దూరం అవుతాయి. గత రెండు సంవత్సరాలుగా గాడి తప్పిన ఆర్థిక స్థితి మెరుగవుతుంది. ఉద్యోగంలా, కుటుంబంలో మంచి మార్పులు చోటుచేసుకుంటాయి.

కుటుంబం

ఈ సంవత్సరం చిన్న చిన్న సమస్యలు మినహా మీ కుటుంబ జీవితం చాలా బాగుంటుంది. గురు, రాహువుల గోచారం అనుకూలంగా ఉండటం, సంవత్సరం మధ్యలో శనిగోచారం కూడా బాగుండటం వలన ఇంట్లో ఆహ్లాదకరమైన వాతావరణం నెలకుంటుంది. కుటుంబ సభ్యుల మధ్యన ప్రేమాభిమానాలు పెరగటం, ఇంట్లో శుభకార్యాలు జరగటం, బంధువులు స్నేహితుల సహాయ సహకారాలు లభించటం మొదలైన ఫలితాలుంటాయి. వివాహం గురించి కానీ, సంతానం గురించి కానీ ఎదురు చూస్తున్న వారికి ఈ సంవత్సరం సెప్టెంబర్నుంచి అనుకూల సమయం. వివాహ, సంతాన యోగాలుంటాయి. అక్టోబర్ నుంచి శని నాలుగవ ఇంట సంచరిస్తాడు కాబట్టి కొంత శ్రమ పెరగటం, కుటుంబ సభ్యుల్లో ఒకరికి అనారోగ్యం కారణంగా కొంత ఆందోళన పడటం అలాగే కొంతకాలం కుటుంబానికి దూరంగా ఉండాల్సి రావటం జరగవచ్చు. అయితే గురు, రాహువుల గోచారం అనుకూలంగా ఉంటుంది కాబట్టి సమస్యలు వచ్చినా తొందరగానే సమసిపోతాయి.

ఆరోగ్యం

ఆరోగ్య విషయంలో ఈ సంవత్సరం ప్రథమార్థం కొంత సామాన్యంగా ఉన్నప్పటికీ, ద్వితీయార్థం చాలా బాగుంటుంది. ప్రథమార్థంలో గురు, రాహువు మరియు శనుల గోచారం అనుకూలంగా లేనందున ఎముకలు, నరాలు, చర్మసంబంధ వ్యాధులు మొదలైన వాటితో కొంత ఇబ్బంది పడే అవకాశముంటుంది. అయితే జూన్ నుంచి శని గోచారం, సెప్టెంబర్ నుంచి గురు, రాహువులో గోచారం అనుకూలంగా ఉండటం వలన ఆరోగ్య సమస్యలు తగ్గుముఖం పడతాయి. అక్టోబర్ తర్వాత అర్ధాష్టమ శని గోచారం కొరణంగా అధిక శ్రమ, చిన్న చిన్న ఆరోగ్యసమస్యలు వచ్చినప్పటికి ఈ సంవత్సరమంతా ఆరోగ్యవిషయంలో అనుకూతంగానే ఉంటుంది అని చెప్పుకోవచ్చు.

ఆర్థిక స్థితి

ఈ సంవత్సరం ప్రథమార్థం ఆర్థికంగా కొంత సామాన్యంగా ఉంటుంది. అయితే జూన్ నుంచి శని, సెప్టెంబర్నుంచి గురు రాహువులు అత్యంత అనుకూలంగా ఉంటారు కాబట్టి ఆర్థికంగా ఈ సంవత్సరం బాగా కలిసి వస్తుంది. గత రెండు సంవత్సరాలుగా ఆదాయం తక్కువ ఖర్చులు ఎక్కువగా గడిచిన మీకు ఈ సంవత్సరం ఆదాయం పెరగటమే కాకుండా, రావలసిన డబ్బులు కూడా తిరిగి వస్తాయి. పెట్టుబడులు కలిసి రావటమే కాకుండా, గృహ యోగం కానీ, స్థిరాస్థుల కొనుగోలు కానీ చేస్తారు. అయితే సెప్టెంబర్ వరకు పెట్టుబడులు పెట్టేవారు లేదా స్థిరాస్థులు కొనుగోలు చేయాలనుకునే వారు ఆగటం మంచిది. సెప్టెంబర్ నుంచి గురు గోచారం అనుకూలంగా ఉంటుంది కాబట్టి ఆ సమయంలో పెట్టుబడులు పెట్టడం అనుకూలిస్తుంది.

ఉద్యోగం - వ్యాపారం

ఉద్యోగ విషయంలో ప్రథమార్థం సామాన్యంగా ద్వితీయార్థం అనుకూలంగా ఉంటుంది. ముఖ్యంగా శని గోచారం అనుకూలంగా లేకపోవటం వలన పనిలో ఒత్తిడి పెరగటం, అదనపు బాధ్యతలు మీద పడటం అలాగే ఇష్టం లేని ప్రదేశానికి బదిలీ అవటం మొదలైన ఫలితాలుంటాయి. గురు, రాహువుల గోచారం అనుకూలంగా ఉంటుంది కాబట్టి కొన్ని సమస్యలు ఉన్నప్పటికీ, ఆర్థికంగా బాగుండటం, ప్రారంభంలో కొంత శ్రమ అయినా తర్వాత అనుకూలించటం వలన సమస్య తగ్గుతుంది. ఉద్యోగంలో ప్రమోషన్ లేదా మార్పు కోరుకుంటున్నవారు జూన్ – అక్టోబర్ మధ్యన ప్రయత్నం చేయటం మంచిది. ఈ సమయంలో శని గోచారం అనుకూలంగా ఉంటుంది కాబట్టి ఫలితం అనుకున్న విధంగా వస్తుంది. వ్యాపారస్థులకు ఈ సంవత్సరం బాగా అనుకూలిస్తుంది. ప్రారంభంలో రాహు గోచారం కారణంగా లాభాలు తక్కువ, పెట్టుబడులు ఎక్కువగా ఉన్నప్పటికీ, సెప్టెంబర్కల్లా పరిస్థితి మారుతుంది. పెట్టిన పెట్టుబడులకు రెట్టింపు లాభాలు రావటం అలాగే వ్యాపారం అభివృద్ధి చెందటం జరుగుతుంది. కొత్తగా వ్యాపారం ప్రారంభించాలకునేవారు సెప్టెంబర్ వరకు ఆగటం మంచిది. గురువు అనుకూల గోచారం ఆరంభం అయ్యాక ప్రారంభించటం వలన ఆర్థికంగా, వ్యాపార పరంగా కలిసి వస్తుంది.

చదువు

విద్యార్థులకు ఈ సంవత్సరం అనుకూలంగా ఉంటుంది. ముఖ్యంగా సెప్టెంబర్ నుంచి గురు, రాహువుల గోచారం అనుకూలంగా ఉండటం వలన చదువులో బాగా రాణించగలుగుతారు. అనుకున్న చోట ఉన్నత విద్యలో ప్రవేశాన్ని పొందుతారు. అయితే శని గోచారం నాలగవ ఇంట ఉండటం, కేతు గోచారం అయిదవ ఇంట ఉండటం కారణంగా చదువు విషయంలో కొంత బద్ధకం ఏర్పడుతుంది. వాయిదాలు వేసే స్వభావం అలవాటవుతుంది. తద్వారా పరీక్షల సమయంలో విపరీతమైన ఒత్తిడికి గురయ్యే అవకాశముంటుంది కాబట్టి వీలైనంత వరకు బద్ధకాని మీ దగ్గరికి రానివ్వకండి.

పరిహారాలు.

ఈ సంవత్సరం సెప్టెంబర్ వరకు గురు, రాహువుల గోచారం, అలాగే అర్ధాష్టమ శని గోచారం అనుకూలంగా ఉండదు కాబట్టి ఈ మూడు గ్రహాలకు పరిహారాలు ఆచరించటం మంచిది. గురు, రాహు లేదా దుర్గా స్తోత్ర పారాయణం చేయటం, ఆంజనేయునికి పూజ చేయటం లేదా శని స్తోత్ర, మంత్ర జపం చేయటం అలాగే విద్యార్థులు గణపతి స్తోత్రం చదవటం మంచిది.

రాజాది నవనాయక ఫలితములు

12 రాశుల ఆదాయ, వ్యయాలు

27 నక్షత్రాల నక్షత్రాల కందాయ ఫలములు

హేమలంబ నామ సంవత్సర రాశి ఫలములు

Aries	Taurus	Gemini
Cancer	Leo	Virgo
Libra	Scorpio	Sagittarius
Capricorn	Aquarius	Pisces