కుంభ రాశి - 2021 రాశి ఫలములు

కుంభ రాశిఫలములు

2021 సంవత్సర రాశిఫలములు

Telugu Rashi Phalalu (Rasi phalamulu)

2021 Rashi phalaalu

గమనిక: ఇక్కడ ఇవ్వబడిన రాశి ఫలములు కేవలం చంద్ర రాశి ఆధారంగా చెప్పబడినవి. ఇవి కేవలం ఒక అవగాహన కొరకే తప్ప ఇందులో చెప్పినవి చెప్పినట్టు జరుగుతాయని భావించరాదు.

Telugu Rashi Phalalu (Rasi phalamulu) - 2021 samvatsara Kumbha rashi phalaalu. Family, Career, Health, Education, Business and Remedies for Kumbha Rashi in Telugu

ధనిష్టా 3, 4 పాదాలు (గు, గె)
శతభిషం 4 పాదాలు (గొ, స, సి, సు)
పూర్వాభాద్ర 1, 2, 3 పాదాలు (సె, సో, ద)

ఈ సంవత్సరం బృహస్పతి మినహా మిగిలిన అన్ని ఇతర నెమ్మదిగా కదిలే గ్రహాలు ప్రస్తుతం తామున్న రాశులపై తమ సంచారాన్ని కొనసాగిస్తాయి. శని మకర రాశిలో పన్నెండవ ఇంటిలో, 4వ ఇంటిలో వృషభ రాశిలో రాహువు, మరియు వృశ్చిక రాశిలో పదవ స్థానంలో కేతువు ఈ సంవత్సరమంతా ఉంటారు. గురుడు ఏప్రిల్ 06న కుంభ రాశిలో ఒకటవ ఇంటిలో ప్రవేశిస్తాడు. వక్రగతి పొందిన తరువాత 14 సెప్టెంబర్ నాడు మకర రాశిలో 12వ ఇంటిలో తిరిగి తన సంచారాన్ని కొనసాగిస్తాడు, నవంబర్ 20న గురుడు మళ్లీ కుంభరాశిలో ఒకటవ ఇంటిలో ప్రవేశిస్తాడు.

వృత్తి

ఈ సంవత్సరం మీకు ఉద్యోగ పరంగా కొంత సామాన్యంగా ఉంటుంది. గురువు మరియు శని గోచారం ఏప్రిల్ వరకు పన్నెండవ ఇంటిలో ఉండటం వలన వృత్తిలో చాలా విషయాల్లో పోరాటం చేయాల్సి వస్తుంది. చిన్న పని పూర్తి చేయడానికి ఎక్కువ ప్రయత్నం చేయాల్సి వస్తుంది. అంతేకాకుండా, మిత్రులు అనుకునేవారు కూడా ఈ సమయంలో సహాయం చేయకుండా శత్రువులు గా మారుతారు. ప్రతి చిన్న పని కూడా ఎవరి సహాయం లేకుండా మీరే సొంతంగా చేసుకోవాల్సి వస్తుంది. ఈ కాలంలో మీకు ఇష్టం లేనప్పుటికీ దూర ప్రదేశంలో పనిచేయాల్సి రావచ్చు. రాహువు గోచారము కూడా అనుకూలంగా లేనందువలన ఎక్కువ శ్రమకోర్చి పనులు చేసినప్పటికీ సరైన గుర్తింపు ఉండకపోవచ్చు. అంతేకాకుండా ఉద్యోగ విషయంలో తెలియని ఆందోళనకు గురవుతారు. ఈ సమయం నిర్లక్ష్యాన్ని, వాయిదా వేసే స్వభావాన్ని తగ్గించుకొని మిమ్మల్ని మీ వృత్తిలో నిపుణులుగా, ఎంతటి శ్రమకైనా ఓర్చి పనిచేసే వారిగా మారుస్తుంది. మీ పనిలో ఉన్న లోపాల్ని సరిచేసి మిమ్మల్ని భవిష్యత్తులో జరిగే పదోన్నతికి సంసిద్ధులుగా మారుస్తుంది. ఏప్రిల్ నుంచి గురువు గోచారం అనుకూలంగా ఉండటం వలన వృత్తిలో ఉండే ఒత్తిడి తగ్గుతుంది. మీకు వృత్తిలో ప్రమోషన్ గానీ, మంచి మార్పు గాని వస్తుంది. అంతేకాకుండా మీ ఆలోచనలకు, మీరు చేసే పనులకు, మీ పై అధికారుల ఆమోదము, ప్రశంసలు లభిస్తాయి. మీకు సహాయం చేయటానికి మిత్రులు కానీ, సహోద్యోగులు కానీ ముందుకొస్తారు. ఉద్యోగంలో మీకు వచ్చిన చాలెంజ్లను విజయవంతంగా పూర్తి చేయగలుగుతారు. దాని వలన మీ పై అధికారుల ప్రశంసలు మీకు లభిస్తాయి. కొత్తగా ఉద్యోగం కొరకు ప్రయత్నిస్తున్న వారికి ఈ సంవత్సరం కొంత సామాన్యంగా ఉన్నప్పటికీ ఏప్రిల్ మరియు సెప్టెంబరు మధ్యలో వారి ప్రయత్నాలు ఫలిస్తాయి. విదేశాలలో ఉద్యోగం కొరకు ప్రయత్నిస్తున్న వారు ఈ సంవత్సరం ప్రథమార్థంకంటే ద్వితీయార్ధంలో అనుకూల ఫలితాలు పొందుతారు. దీనికి గాను ఎక్కువ శ్రమ చేయాల్సి ఉంటుంది, మరియు ఎక్కువగా ప్రయత్నం చేయాల్సి ఉంటుంది. సరైన ఉద్యోగ ఉపాధి అవకాశాలు లేకుండా ఈ సమయంలో విదేశాలకు వెళ్లడం అంతగా అనుకూలించే విషయం కాదు.

కుటుంబం

ఈ సంవత్సరం కుటుంబ పరంగా కొంత సామాన్యంగా ఉంటుంది. ఏప్రిల్ వరకు గురువు మరియు శని గోచారం పన్నెండవ ఇంటిలో అనుకూలంగా లేకపోవడం అలాగే శని దృష్టి కుటుంబ స్థానమైన రెండవ ఇంటిలో ఉండటం వలన కుటుంబంలో ప్రశాంతత తగ్గిపోవటం జరుగుతుంది. కుటుంబ సభ్యుల మధ్య ఉండే ప్రేమాభిమానాలు తగ్గటంతో ఆ ప్రభావం మీ మీ పై పడుతుంది. దాని కారణంగా మీరు మానసిక ఒత్తిడికి గురవుతారు. మీ మాటకు విలువ లేకపోవడం మీరు ఏం చెప్పినా ఎదుటివారు తేలిగ్గా తీసుకోవడం వలన తీవ్రమైన నిరాశకు లోనయ్యే అవకాశం ఉంటుంది. ఈ సమయంలో ఏ విషయాన్ని అయినా ఓపికగా ఒకటికి రెండు సార్లు ప్రయత్నం చేసి అనుకూలం చేసుకోవాలి తప్ప కోపానికి ఆవేశానికి గురి కాకూడదు. ఏప్రిల్ నుంచి సెప్టెంబరు మధ్యలో గురువు గోచారం జన్మ స్థానంలో కొంత అనుకూలంగా ఉండటం వలన మీకు మానసిక ప్రశాంతత తిరిగి వస్తుంది. మీ జీవిత భాగస్వామి సహాయ సహకారాలు అందటం వలన మీరు చేపట్టిన పనులను విజయవంతంగా పూర్తి చేయగలుగుతారు. మీ కుటుంబంలో ప్రశాంతతను తిరిగి నిలుపగలుగుతారు. మీ సంతానం సాధించిన విజయాలు మీకు ఆనందాన్ని సంతృప్తినిస్తాయి. మీ తండ్రి సహకారంతో ఒక ముఖ్యమైన పని పూర్తి చేయగలుగుతారు. స్థిరాస్తుల కొనుగోలు చేయడం కానీ లేదా మీకు స్థిరాస్తులు తిరిగి రావడం గానీ జరుగుతుంది. ఈ సంవత్సరం ప్రథమార్థంలో కుటుంబ విషయంలో కొంత వ్యతిరేకంగా ఉన్నప్పటికీ ద్వితీయార్థం అనుకూలించడం వలన మానసికంగా మరియు కుటుంబ పరంగా ఆనందాన్ని పొందుతారు. వివాహం కాని, సంతానం కాని లేని వారికి ఈ సంవత్సరం ద్వితీయార్ధంలో అనుకూలమైన ఫలితం లభిస్తుంది.

ఆర్థిక స్థితి

ఈ సంవత్సరం ఆర్థిక పరిస్థితి విషయానికి వస్తే ఇది మీకు అనుకూలంగా ఉండదు. మీరు నిరంతరం ఆదాయం కొరకు, డబ్బుల కొరకు ప్రయత్నించాల్సి వస్తుంది. అనుకున్న సమయానికి డబ్బులు అందకపోవటం వల్ల మీరు కొంత ఇబ్బందులకు లోనవుతారు. డబ్బు అందక పోవటం వలన, తొందరపడి అప్పులు చేయడం ఈ సమయంలో సరైన పని కాదు. కొద్దిగా ఓపికగా ఉన్నట్లయితే మీకు రావలసిన డబ్బు తిరిగి వస్తుంది. వేగంగా డబ్బు సంపాదించడం కొరకు, లేదా ఎక్కువ డబ్బు సంపాదించేందుకు ప్రమాదం తో కూడిన పనులు చేయకండి. దాని వలన మరింత సమస్యలకు లోనవుతారు. ఆరోగ్య విషయాలకు, కుటుంబ విషయాలకు ఎక్కువ డబ్బు ఖర్చు చేయాల్సి వస్తుంది. ఏప్రిల్ నుంచి సెప్టెంబరు మధ్యలో గురు గోచారం జన్మ స్థానంలో ఉండటం వలన ఆర్థికంగా కొంత అనుకూలమైన పరిస్థితులు ఏర్పడతాయి. ఆగిపోయిన డబ్బులు తిరిగి రావడం కానీ లేదా గతంలో పెట్టిన పెట్టుబడి నుంచి లాభాలు రావడం కానీ జరుగుతుంది. దీనివలన మీకు అవసరమైనంత డబ్బు చేతికి అందుతుంది.

ఆరోగ్యం

ఆరోగ్య విషయంలో ఈ సంవత్సరం ప్రథమార్థంలో సామాన్యంగా ఉంటుంది. పన్నెండవ ఇంటిలో ఏప్రిల్ వరకు గురువు మరియు శని గోచారం ఉండటం వలన ఆరోగ్య విషయంలో కొంత జాగ్రత్త అవసరం. దంతాలు, ముఖం, కాళ్లు, ఊపిరితిత్తులు మరియు వెన్నెముకకు సంబంధించిన ఆరోగ్య సమస్యలు ఈ సంవత్సరం ప్రథమార్ధంలో వచ్చే అవకాశం ఉంటుంది. సరైన ఆహారపు అలవాట్లు పాటించడం అలాగే యోగ, ప్రాణాయామం లాంటి సహజ ఆరోగ్య పద్ధతులు పాటించడం వలన ఆరోగ్య సమస్యలు తగ్గుతాయి. ఏప్రిల్ నుంచి గురువు గోచారం ఒకటవ ఇంట్లో ఉండటం వలన ఆరోగ్యం విషయంలో మెరుగైన ఫలితాలు చూస్తారు. క్రమంగా ఆరోగ్య సమస్యలు తగ్గటం, ఆరోగ్యం బాగుపడటం జరుగుతుంది. అయితే సంవత్సరమంతా శని మరియు రాహువు వ్యతిరేక గోచారం ఉండటం వలన వీలైనంతవరకు ఆరోగ్య విషయంలో శ్రద్ధ వహించడం మంచిది. వేగంగా వాహనాలు నడపడం, సరైన ఆహారపు అలవాట్లు లేకపోవడం లాంటివి చేయకుండా ఉండటం మంచిది. ఈ సమయం శారీరకంగా, మానసికంగా మీలో ఉన్న లోపాలను తెలుసుకొని సరిదిద్దు కోవడానికి సహకరిస్తుంది. ఏ ఆరోగ్య సమస్య వచ్చినా గాభరా పడకుండా ప్రశాంతంగా ఉండటం వలన మీరు తొందరగా కోలుకునే అవకాశం ఉంటుంది.

చదువు

విద్యార్థులకు ఈ సంవత్సరం మిశ్రమ ఫలితాలను ఇస్తుంది. ఈ సంవత్సరం ప్రథమార్థంలో గురు దృష్టి నాలుగవ ఇంటిలో ఉండటం, ద్వితీయార్ధంలో గురు దృష్టి ఐదవ మరియు తొమ్మిదవ ఇంటిపై ఉండటం వలన చదువు విషయంలో ఎక్కువ ఆందోళన అవసరం లేదు. మీరు చదువుకోడానికి, మంచి మార్కులతో ఉత్తీర్ణులు అవడానికి ఎన్నో అవకాశాలు వస్తాయి. వాటిని సద్వినియోగం చేసుకోవడం మంచిది. కాకపోతే పన్నెండవ ఇంటిలో శని గోచారం మరియు నాలుగవ ఇంటిలో రాహు గోచారం కారణంగా స్వయంకృత అపరాధము వలన చదువులో ఆటంకాలు ఏర్పడటం కానీ లేదా తక్కువ మార్కులు రావడం గానీ జరుగుతుంది. నిర్లక్ష్యానికి కానీ అహంకారానికి కానీ లోనవకుండా, నిజాయితీగా ప్రయత్నించడం వలన మీరు చదువులో ఉన్నత స్థాయిని పొందుతారు. కాంపిటీటివ్ పరీక్షలు రాసే వారికి ద్వితీయార్థం అనుకూలంగా ఉంటుంది. మీపై మీకు నమ్మకం తగ్గించుకోకుండా ఒకటికి రెండు సార్లు ప్రయత్నించడం వలన అనుకున్న ఫలితాన్ని పొందగలుగుతారు.

పరిహారాలు

ఈ సంవత్సరం గురు, శని మరియు రాహువుల గోచారం అనుకూలంగా ఉండదు కాబట్టి ఈ గ్రహాలకు పరిహారాలు చేయటం మంచిది. గురువు గోచారం ఈ సంవత్సరం 12వ మరియు ఒకటవ ఇంటిపై ఉండటం వలన ఆర్థిక మరియు ఆరోగ్య సమస్యలు వచ్చే అవకాశం ఉంటుంది కాబట్టి గురువుకి పరిహారాలు చేయటం వలన ఈ సమస్యల నుంచి బయట పడగలుగుతారు. దీనికి గాను ప్రతిరోజు గురు స్తోత్ర పారాయణం చేయటం కానీ, గురు చరిత్ర పారాయణం చేయడం కానీ లేదా గురు మంత్ర జపం చేయడం కానీ మంచిది. సంవత్సరమంతా శని గోచారం పన్నెండవ ఇంటిలో వ్యతిరేకంగా ఉంటుంది కాబట్టి దీని కారణంగా వృత్తిలో సమస్యలు, ఆరోగ్య సమస్యలు మరియు కుటుంబ సమస్యలు వచ్చే అవకాశం ఉంటుంది. ఈ చెడు ప్రభావం నుంచి బయటపడడానికి ప్రతిరోజు శని స్తోత్ర పారాయణం చేయటం, శనికి పూజ చేయటం లేదా శని మంత్ర జపం చేయటం మంచిది. దానితో పాటుగా వృద్ధులకు, అనాథలకు, వికలాంగులకు సహాయం చేయటం వలన కూడా శని సంతోషించి అనుకూలమైన ఫలితాలు ఇస్తాడు. ఈ సంవత్సరమంతా రాహు గోచారం నాలుగవ ఇంటిలో ఉంటుంది. దీని కారణంగా శారీరక మానసిక ఒత్తిడులు ఆరోగ్య సమస్యలు ఉంటాయి. ఈ చెడు ప్రభావం నుంచి బయట పడటానికి ప్రతిరోజు రాహు గ్రహ స్తోత్రం, రాహు మంత్ర జపం చేయటం లేదా దుర్గా స్తోత్రం పారాయణం చేయడం మంచిది.